Killer Bob

Bobtaun şəhərində fəaliyyət göstərən peşəkar qatil Killer Bob cinayətkar qruplaşmanın gizli sığınacağına qəfil hücum edir. Döyüş bacarıqları ilə rəqiblərini zərərsizləşdirən atıcı mafiya üzvlərini darmadağın edir. Öz yuvasına edilən basqından qorxuya düşən cinayətkar lideri Kappuçino bu qisasın yerdə qalmayacağını bildirir.

Kappuçinonun əməllərindən təngə gələn detektiv Kromvell hadisələrə müdaxilə etmək məcburiyyətində qalır. O, qanunları pozan Killer Bobu həbs etmək və ya mafiyanı məhv edən muzdlu qatilə mane olmamaq arasında seçim qarşısındadır. Heç kimlə dostluq etməyən Bob isə tezliklə xidmət etdiyi agentliyin onu aradan qaldırmaq üçün ölüm əmri verdiyini öyrənir.

2008-ci ildə nümayiş olunan «Killer Bob» cizgi filmi ABŞ və Uruqvay istehsalıdır. Ekran əsərinin rejissoru Ceff Lyudur; əsas obrazları Devid Qilmett, Ceff Lyu, Brayan Seşn və Metyu Tayler səsləndirib.