9,99 dollar

İşsiz Deyv Pek atası və qardaşı ilə eyni mənzildə yaşayır. Günlərin birində onun qarşısına həyatın mənasını cəmi bir neçə dollara izah etməyi vəd edən rəngli kitabça elanı çıxır. Əldə etdiyi cavabları başqaları ilə bölüşmək istəyən Deyv ətrafındakı insanlarla ünsiyyət qurmağa çalışır.

Baş qəhrəman yaşadıqları binanın sakinləri ilə yaxından tanış olur. Qonşuların hər biri qeyri-adi xarakterə malikdir: bir qoca evində bədbin mələyə sığınacaq verib, cazibədar modelin qəribə zövqləri var, içkiyə qurşanmış gənc beş santimetrlik kiçik varlıqlarla vaxt keçirir, azyaşlı uşaq isə saxsı donuz-qutusu ilə dostluq edir. Onların heç bir təlimata ehtiyacı yoxdur, çünki hər kəsin öz həqiqəti var.

«$9.99» adlı animasiya filmi rejissor Tatya Rozental tərəfindən lentə alınıb. Avstraliya və İsrailin birgə istehsalı olan layihənin personajlarını Ceffri Raş, Entoni LaPalya, Semyuel Conson və Berri Otto səsləndiriblər. Ekran əsəri 2008-ci ildə işıq üzü görüb.