GUILTY GEAR STRIVE: DUAL RULERS

Texnologiya dövrü geridə qalaraq yerini yeni enerji mənbəyi olan sehrə buraxıb. İnsanların hazırladığı qadağan olunmuş bioloji silahlar — Qirlər qiyama qalxaraq qanlı Səlib yürüşlərinə səbəb olub. Bəşəriyyət sağ qalmağı bacarsa da, müharibənin vurduğu dərin mənəvi yaralar onilliklər keçməsinə baxmayaraq hələ də sağalmayıb.

Həm insan, həm də Qir qanı daşıyan Sin Kiske valideynləri Kay və Dizzinin toy mərasiminə yollanır. İki fərqli növün bir araya gəlməsi uzun müddət qadağa sayılsa da, illər sonra bu nikaha xeyir-dua verilir. Lakin mərasim zamanı peyda olan və Qirlərə nifrət edən sirli qız hadisələrin gedişatını dəyişir.

2025-ci il istehsalı olan bu yapon cizgi filminin rejissoru Şiqeru Morikavadır. Layihənin əsas personajlarını Mayumi Asano, Cuniçi Endo, Takeşi Kusao və Yuci Mikimoto kimi aktyorlar səsləndirib.