D: Qan yanğısı

Uzaq gələcəkdə bəşəriyyət bir vaxtlar hökmranlıq etmiş vampirlərdən hələ də dəhşət içində çəkinir, baxmayaraq ki, onların nəsli kəsilmək üzrədir. Varlı bir ailənin qızı qaniçən tərəfindən qaçırıldıqda, qohumları kömək üçün yarıinsan-yarıvampir olan D adlı ovçuya üz tuturlar. Ona qızı sağ-salamat geri qaytarmaq, gecikdiyi halda isə onu məhv etmək tapşırılır.

Ailə tək bir döyüşçüyə güvənməyərək tapşırığın icrası üçün təpədən-dırnağadək silahlanmış bütöv bir dəstəni də işə götürür. Beləliklə, qızın axtarışı D ilə digər rəqib ovçular arasında gərgin yarışa çevrilir. Tərəflər qaçırılan qızın və onu aparan sirli varlığın izi ilə təhlükəli yola düşürlər.

«Vampire Hunter D - Bloodlust» tammetrajlı animasiya filmi 2000-ci ildə Yaponiya və ABŞ-ın birgə istehsalı kimi təqdim edilib. Fantastika və döyüş janrlarını birləşdirən ekran əsərinin rejissoru Yoshiaki Kawajiridir, əsas rolları isə Hideyuki Tanaka, Ichiro Nagai, Koichi Yamadera və Megumi Hayashibara səsləndirib.