Kensukenin krallığı

Ailəsi ilə birlikdə yaxtada dəniz səyahətinə çıxan Mayklın yolu qəfil qopan güclü fırtına ilə kəsilir. Hündür dalğalar balaca oğlanı və sadiq itini göyərtədən suya atır. Sahilə çıxaraq özünə gələn Maykl naməlum bir adada olduğunu və burada sirli bir yaponun məskən saldığını öyrənir.

İllərdir təklikdə yaşayan qoca qonağın gəlişinə qətiyyən sevinmir və ondan uzaq durmağa çalışır. Lakin yadellilərin adaya gətirdiyi qorxunc təhlükə bu münasibətləri dəyişir. «Kensuke's Kingdom» cizgi filmində qəhrəmanlar həmin gizli məkanı qorumaq naminə ortaq dil tapmalı olurlar.

2023-cü il istehsalı olan bu macəra layihəsi Böyük Britaniya, Fransa və Lüksemburqun birgə əməyidir. Ekran əsərinin quruluşçu rejissorları Nil Boyl və Kirk Həndridir, personajları isə Killian Mörfi, Salli Hokins, Rəffi Kessidi və Ken Vatanabe səsləndirib.