Qız və əjdaha

Kiçik bir şəhərdə gecələr hər kəs yatarkən, fənərçi balaca bayquşun köməyi ilə küçələri işıqlandırırdı. Səhər açılanda isə şəhər meri fənərlərin vaxtında söndürülməsinə nəzarət edirdi. Elə həmin vaxtlarda zibil qutusunda yaşayan Drakoşa adlı əjdaha oyanırdı; pis davranışlarına görə heç kim onunla yoldaşlıq etmək istəmirdi. Bir gün əjdaha fənərçinin qəzetini yeyib onu vurduqdan və üfürərək merin yanına uçurduqdan sonra incimiş fənərçi işini buraxdı.

Qaranlıq düşəndə şəhəri işıqlandıracaq kimsə qalmadığı üçün mer bərk narahat olmağa başladı. Bu arada Drakoşa ondan zərrə qədər də çəkinməyən balaca bir qızla rastlaşdı. Mehriban qız onunla dostlaşdı və ona müxtəlif əyləncəli oyunlar oynamağı öyrətməyə başladı.

«Qız və əjdaha» (Девочка и дракон) adlı qısametrajlı cizgi filmi 1983-cü ildə SSRİ-də rejissor Yuri Trofimov tərəfindən çəkilib. Kadrarxası mətni Aleksey Batalov səsləndirib.