Mamont balası üçün ana

Balaca bir mamont balası soyuq buzlaqlar arasında donaraq nəsli tükənmiş digər mamontlardan fərqli olaraq sağ qalmağı bacarır. Əsrlər boyu buzlarda qalan körpə nəhayət donu açıldıqdan sonra anasını axtarmağa başlayır. Kimsəsiz qalmış qəhrəman ilk öncə ağ ayı balası və qoca Morj ilə tanış olur.

Məhz müdrik Morj babadan öyrənir ki, uzaq cənubda nəhəng bir qitə var və orada ona bənzəyən, lakin yunu olmayan heyvanlar yaşayır. Anasını tapmaq ümidi ilə yola çıxan cəsur körpə bir buz parçası üzərində nəhəng okeanı keçməyə başlayır.

«Mamont balası üçün ana» adlı qısametrajlı cizgi filmi 1981-ci ildə SSRİ-də rejissor Oleq Çurkin tərəfindən çəkilib. Baş qəhrəmanların səsləndirilməsində Klara Rumyanova, Zinovi Qerdt, Zinaida Narışkina və Qriqori Tolçinski iştirak ediblər.