Um və Xrum

İki sevimli bədheybət dost hər şeyin yeməkdən ibarət olduğu qeyri-adi bir planetdə məskunlaşıb. Onlardan biri olan Xrumun heç cür doymayan iştahı var və qarşısına çıxan ləziz təamları dərhal yeyir. Nəticədə isə o, həmin an yediyi yeməyin və ya ərzağın formasına düşür.

Bu qəribə dəyişikliklər hər dəfə qəhrəmanların başına gözlənilməz çətinliklər açır. Belə vəziyyətlərdə hər zaman onun zəkalı dostu Um köməyə çatır. O, ağlı və tədbirliliyi sayəsində ölçü bilməyən dostunu növbəti xoşagəlməz hadisələrdən xilas etməyin yollarını axtarır.

Rusiyanın uşaqlar üçün çəkdiyi «Um və Xrum» cizgi serialı 2022-ci ildə rejissor Oleq Şeplyakov tərəfindən lentə alınıb. Baş qəhrəmanları Aleksey Nikitin, İvan Çaban, Maksim Sergeyev və Yelizaveta Çaban səsləndirib. Cizgi layihəsi 4 mövsümdən ibarətdir.