Subay

Brahmaçari uşaqlıqda küçədən tapıldığını bilərək böyüyüb. Gündüzlər fotoqraflıq edən, axşamlar isə musiqi çalan bu gənc eyni zamanda kimsəsiz uşaqlara arxa durur. Evin girov pulunu ödəmək zərurəti qarşısında qalan Brahmaçari qəzet redaktorunun tapşırığını yerinə yetirməyə məcbur olur.

Bu iş əsnasında o, Şital Çadhabari adlı gənc qadının canına qəsd etməsinin qarşısını alır. Şital uşaqlıqdan nişanlı olduğu Ravi Xannanın ondan imtina etməsinə dözə bilməyib, çünki Bombeydə varlanan keçmiş nişanlısı onu kəndli və sadəlövh sayır. Brahmaçari Şitalı dəyişdirib keçmiş sevgilisinin tələblərinə uyğunlaşdırmağı boynuna götürür, əvəzində isə qızdan borcunu ödəmək üçün vəsait istəyir. Tədricən onların arasında sevgi bağı yaranır.

«Subay» adlı hind filminin rejissoru Bhappi Sonidir. 1968-ci ildə ekranlara çıxan bu musiqili dramda baş rolları Şammi Kapur, Racşri, Pran və Mumtaz canlandırıblar.