İlin müəllimi

Folbruk məktəbinə yeni gələn cənab Di dərhal hər kəsin diqqət mərkəzinə çevrilir. Öz cazibəsi və qeyri-adi yanaşması ilə şagirdlərin rəğbətini qazanan bu müəllim qısa zamanda kollektivdə fərqlənməyə başlayır. Lakin onun bu populyarlığı qayda-qanuna ciddi riayət edən həmkarı cənab Uornerin heç xoşuna gəlmir. İllərdir «İlin müəllimi» adına can atan pedant pedaqoq şanslarının əldən getdiyini anlayır.

Nüfuzunu itirməkdən qorxan Uorner gənc rəqibinə qarşı gizli mübarizəyə başlayır və istəyinə çatmaq üçün geri çəkilmək fikrində deyil. Lakin heç kimin xəbəri yoxdur ki, cənab Dinin gizlətdiyi sirr tezliklə bütün məktəb mühitinə təsir edəcək və iki rəqibi barışdıraraq onlara ən dəyərli dərsi verəcək.

«School of Life» adlı komediya-dram filmini rejissor Uilyam Dir çəkib. ABŞ və Kanadanın birgə istehsalı olan bu ekran əsəri 2003-cü ildə təqdim olunub. Əsas rollarda Rayan Reynolds, Devid Peymer, Con Astin və Endrü Robb çıxış edirlər.