Villini azad edin

Nəhəng qatil balina öz ailəsindən qoparılaraq əyləncə parkına gətirilir. Su parkının sahibləri ona Villi adını verir və bu dəniz canlısının iştirakı ilə təşkil olunacaq şoulardan böyük gəlir əldə etməyi planlaşdırırlar.

Eyni vaxtda tamaşaçılar evdən qaçan, küçələrdə oğurluq və dilənçiliklə gün keçirən Cessi adlı yeniyetmə ilə tanış olurlar. Yeni himayədar ailə tapan Cessi cəza olaraq parkda çəkdiyi qrafittiləri təmizləməli olur. Həmin vaxt çətin xasiyyətli oğlan qatil balina ilə qarşılaşır və aralarında ilk baxışdan möhkəm dostluq yaranır.

«Free Willy» ailəvi macəra dramının quruluşçu rejissoru Saymon Uinserdir. ABŞ və Meksika istehsalı olan bu film 1993-cü ildə ekranlara çıxıb və eyniadlı franşizanın əsasını qoyub. Əsas rolları Ceyson Ceyms Rixter, Lori Petti, Ceyn Etkinson və Auqust Şellenberq canlandırıblar.