Ailəvi kabus

Bankdakı işindən ayrılan Vasili Kirsanov illüziyaçı olmaq və böyük səhnə şousu yaratmaq arzusuna düşür. O, xəyallarını gerçəkləşdirmək naminə həyat yoldaşı Svetlananı geniş mənzillərini satmağa və iki uşaqla birlikdə kiçik bir otaqlı evə köçməyə razı salır. Lakin hazırlanan nümayiş tamamilə uğursuzluqla nəticələnir və ailə üçün darısqal mənzildə dözülməz günlər başlayır.

Vəziyyətdən çıxış yolu axtaran Vasili son pulları hesabına şübhəli dərəcədə ucuz satılan üçotaqlı mənzil tapıb alır. Doğmalarına rahat həyat qaytarmaq istəyən qəhrəman çox keçmədən bu yerin sirrini öyrənir. Bəlli olur ki, yeni evin artıq öz sahibi var və bu, əsl kabusdur.

«Ailəvi kabus» komediya filmi 2025-ci ildə Rusiyada rejissor Aleksandr Babayev tərəfindən ekranlaşdırılıb. Ekran əsərinin baş rollarında Maksim Laqaşkin, Nikita Koloqrivıy, Oksana Akinşina və Kristina Korbut çəkiliblər.