Göz bərabərliyində

On yaşlı Mixi anasının vəfatından sonra uşaq evində böyüyür. Günlərin birində anasından qalan plastinkaların arasında göndərilməmiş bir məktub tapır. Bu məktub sayəsində oğlan öz doğma atasının izinə düşmək şansı qazanır.

Mixi atasının ucaboy və güclü bir adam olduğunu xəyal etsə də, qarşılaşdığı reallıq tamamilə fərqli çıxır: tapdığı ata boyca hətta ondan da qısadır. İnternatdakı digər uşaqlar bu həqiqəti öyrənən kimi Mixini ələ salmağa və lağa qoymağa başlayırlar. Təhqirlərə dözməyən uşaq oradan qaçmağı seçir, lakin bu addım onun qarşısına yeni çətinliklər çıxarır.

Almaniya istehsalı olan «Auf Augenhöhe» filmi 2016-cı ildə ekranlara çıxıb, ailəvi dram və komediya janrlarını özündə birləşdirir. Ekran əsərinin rejissor kürsüsündə Yoahim Dollhopf və Evi Qoldbrunner əyləşib. Baş rolları Luis Vorbax, Cordan Prentis, Ella Frey və Marko Lixt canlandırıb.