Rokka dünyanı dəyişir

On bir yaşlı Rokkanın uşaqlığı hamınınkından fərqli keçib. Anasını doğuş zamanı itirən qız astronavt atası ilə birlikdə beynəlxalq kosmik stansiyada böyüyüb. Balaca qəhrəman artıq təyyarə və qayıq idarə etməyi bacarır, öz ayaqları üstündə durur, lakin onun heç vaxt həmyaşıdları arasında dostu olmayıb.

Qızının yer üzündəki həyata alışmasını və yoldaşlar tapmasını istəyən ata onu Hamburqdakı adi bir məktəbə göndərir. İlk dəfə sinfə qədəm qoyan Rokka müasir yeniyetmələrin dünyasını görüb məyus olur: onlar ancaq sosial şəbəkələrdə vaxt keçirir, kosmosla maraqlanmır və sinif yoldaşlarını ələ salırlar. Qeyri-adi baxışlara malik qız bu mühiti yaxşılığa doğru dəyişməyə çalışır.

Almaniya istehsalı olan «Rokka dünyanı dəyişir» ailəvi macəra filmi 2019-cu ildə rejissor Katya Benrat tərəfindən çəkilib. Baş rolları Luna Maksayner, Kaspar Fişer-Ortmann, Luise Richter və Leo Knizka canlandırıblar.