Sannibruk fermasından Rebekka

Səhər yeməyi lopaları istehsalçısı Sayras Bartlett radio prodüseri Entoni Kentin qarşısında tələb qoyur: gələn həftəyə qədər «Balaca miss Amerika» tapılmalıdır. Entoni günlərlə saysız-hesabsız namizədləri dinləyir, lakin onların heç biri reklam üçün uyğun gəlmir. Nəhayət, studiyada səkkiz yaşlı Rebekka Uinstidin səsi ucalır.

Qızcığazın ifasını eşidən Entoni axtardığı istedadı tapdığını düşünür, lakin işçilərin səhvi üzündən Rebekkanı və dayısını tələsik binadan çıxarırlar. Əsəbiləşən prodüser əməkdaşlarına qızı tapmağı tapşırıb dincəlmək üçün kənddəki fermaya yollanır. Tale elə gətirir ki, Rebekka da qonşu fermada yaşayan xalasının yanına düşür. Qonşulardan xoşu gəlməyən xala uşağa onlarla danışmağı qadağan etsə də, bu vəziyyət gedişatı dəyişir.

1938-ci il istehsalı olan «Rebecca of Sunnybrook Farm» musiqili komediya filminin quruluşçu rejissoru Allan Duondur. Baş rolları Şirli Templ, Rendolf Skott, Cek Heyli və Qloriya Styuart canlandırıblar.