Xəzinə

Yeniyetmə Stenli etmədiyi bir cinayətə görə həbs olunur: onu idman ayaqqabısı oğurlamaqda günahlandırırlar. Cəzasını çəkmək üçün o, Texas çölündə yerləşən islah düşərgəsinə göndərilir. Müəssisə rəhbərliyi gəncləri quru torpaqda hər gün dərin quyular qazmağa məcbur edir və bunu xarakterin möhkəmləndirilməsi kimi qələmə verir.

Çox keçmir ki, bu qəribə tapşırığın arxasında tamahkar bir niyyətin durduğu bəlli olur. Nəzarətçilər əslində uşaqların əməyindən torpağın altında gizlədilən xəzinəni axtarmaq üçün istifadə edirlər. Stenli bu axtarışların onun ailəsini uzun illərdir təqib edən qədim lənətlə birbaşa bağlı olduğunu üzə çıxarır.

«Holes» adlı macəra filmi 2003-cü ildə ABŞ-da istehsal olunub. Ekran əsərinin rejissoru Endrü Devisdir. Baş rolları Şaya LaBaf, Siqurni Uiver, Con Voyt və Patrişa Arkett canlandırıblar.