Florens Naytingeyl

Varlı zadəgan ailəsində böyüyən gənc qadın cəmiyyətin ondan gözlədiyi rahat həyatdan imtina edir. «Florens Naytingeyl» bioqrafik filmi yaralılara xidmət etməyi seçən və əsgərlər tərəfindən «Əlində çıraq olan xanım» kimi tanınan məşhur tibb bacısının gənclik illərindən bəhs edir.

Öz əsl yolunu tapmağa çalışan qəhrəman sevgisi ilə amalları arasında qalır. Şəxsi səadətini fəda edərək hərbi xəstəxanalarda çalışan Florens, qarşılaşdığı bütün çətinliklərə baxmayaraq xəstələrə qulluq işində mühüm yeniliklərə imza atır.

Böyük Britaniya istehsalı olan ekran əsəri 1985-ci ildə rejissor Deril Dük tərəfindən lentə alınıb. Filmdə əsas rolları Jaklin Smit, Kler Blum, Timoti Dalton və Timoti Uest canlandırıblar.