Venesiya çağırır

On dörd yaşlı Emil qeyri-adi bir ailədə böyüyür. Anası sarışınların həyatda daha bəxtəvər olduğuna inanır və bu səbəbdən oğlunun qara saçlarını hər ay sarı rəngə boyayır. Ticarət nümayəndəsi işləyən atası isə şəxsi evini heç cür tikib qurtara bilmədiyi üçün ailə balaca bir furqonda qalmağa məcburdur.

Emilin xoşladığı Polina adlı qız onu Venesiyada keçiriləcək konsertinə dəvət etdikdə vəziyyət tamam dəyişir. Valideynlər yeniyetməni tək buraxmaq istəmir və bütün ailə birlikdə səfərə çıxmağa qərar verir. Beləliklə, onların köhnə furqonla İtaliyaya doğru başladığı yol qəribə və gülməli hadisələrlə dolu bir macəraya çevrilir.

2019-cu il istehsalı olan «Venesiya çağırır» (Venise n'est pas en Italie) filmi Fransa və Belçika kinematoqrafçılarının birgə dram komediyasıdır. Ekran əsərinin rejissoru İvan Kalberakdır, əsas rolları Benua Pulvord, Valeri Bonneton, Eli Tonna və Ejen Markus canlandırıblar.