Mənim pişiyim və mən

Balaca Klemans zolaqlı pişiyi Rru ilə birlikdə Parisdən kənara, təbiət qoynuna tətilə yollanır. Şəhərdən uzaqda vaxt keçirmək qıza darıxdırıcı görünsə də, onun dördayaqlı balaca dostu üçün bura tamam başqa bir aləmdir. Hər şeylə maraqlanan pişik balası kənd mühitində heç vaxt darıxmır.

Klemans sakit həyata alışmağa çalışarkən, Rru yaxınlıqdakı meşələrin dərinliklərinə doğru addımlayır. Vəhşi təbiətlə üz-üzə gələn balaca kəşfiyyatçı burada qaban balası, vaşaq, bayquş və digər meşə sakinləri ilə qonşu olur. Bu yeni tanışlıqlar onun üçün unudulmaz təcrübəyə çevrilir.

«Mon chat et moi, la grande aventure de Rroû» filmi 2023-cü ildə Fransa və İsveçrə kinematoqrafçılarının birgə əməyi sayəsində ərsəyə gəlib. Ekran əsərinin rejissoru Qiyom Maydaçevskidir. Baş rollarda Kapusin Senson-Fabress, Korin Mazyero, Lüsi Loran və Nikolya Umbdenstok çəkiliblər.