Dahi körpələr

Gizli fəaliyyət göstərən «Beybiko» laboratoriyasının mütəxəssisləri körpələrin xüsusi dilə və böyükləri üstələyən qeyri-adi zəkaya malik olduğunu üzə çıxarırlar. Tədqiqat mərkəzində digər uşaqlarla birgə saxlanılan iki yaşlı Slay bu kəşfin ən parlaq nümunəsidir. Həm iti ağlı, həm də fiziki gücü ilə seçilən balaca oğlan dörd divar arasında yaşamaq fikrində deyil.

Mühafizəçiləri asanlıqla aldadan Slay gizli mərkəzdən qaçaraq şəhərin küçələrinə çıxır. Azadlığın dadını çıxaran balaca qəhrəman şəhərdə sərbəst gəzişir və müxtəlif gülməli vəziyyətlərə düşür. Çox keçmədən onu həyatını büsbütün dəyişdirəcək mühüm bir qarşılaşma gözləyir.

«Baby Geniuses» ailəvi fantastik komediyasını ABŞ rejissoru Bob Klark ərsəyə gətirib. 1999-cu ildə təqdim olunan filmdə baş rolları Ketlin Törner, Yucin Osment, Kristofer Broton və Cudit Dreyk paylaşıblar.