Mənim yeni tərəfdaşım

Los-Anceles polisi Keysi Qalaher gizli əməliyyat keçirmək tapşırığı alır. O, oğurluq brilyantları satan cinayətkarı iş başında yaxalamalıdır. İçində dövlət pulları olan çamadanla görüşə yollanan xəfiyyə gözlənilməz zərbə ilə huşunu itirir.

Özünə gələn polis qeyri-adi bir varlıqla — Qnorm adlı cırtdanla qarşılaşır. Məlum olur ki, hər ikisi eyni cinayətkarın ardınca düşüb. Keysi itirdiyi xidməti pulları geri qaytarmalı, Qnorm isə yeraltı dünyaya həyat və işıq bəxş edən sehirli Lümen daşını xilas etməlidir. «A Gnome Named Gnorm» filmi bu iki fərqli qəhrəmanı bir araya gətirir.

1990-cı ildə ABŞ-da çəkilmiş bu komediya macərasının rejissoru Sten Uinstondur. Əsas rolları Maykl Faustino, Mayk Eyveri, Kreyq Keton və Con Prays canlandırıb.