Sadiq ürək

Kiçik təyyarə ilə edilən adi səyahət Kanada meşələrinin dərinliklərində qəza ilə nəticələnir. On dörd yaşlı əkizlər Sem və Bonni bu təhlükəli qəzadan sağ çıxan yeganə sərnişinlər olurlar. Vəhşi təbiətin ortasında tək qalan uşaqların köməyinə Honanesta adlı yerli hindu gəlir və onları qorumağı öz üzərinə götürür.

Yol yoldaşlarını sərt şimal təbiətinin qoynunda təhlükəli bir keçid gözləyir. Onlar meşələrdə addımlayarkən həm ayıların hərəkətlərini izləyir, həm də ölümcül təhlükə törədən brakonyerlərlə qarşılaşırlar. İxtiyarsız macəraya atılan qəhrəmanlar vəhşi meşənin sınaqlarına sinə gərməli olurlar.

«Sadiq ürək» (True Heart) macəra və ailə dramı janrında 1999-cu ildə ABŞ-da çəkilib. Filmin rejissoru Ketrin Kirandır, baş rollarda isə Zakari Tay Brayan, Dankan Freyzer, Tom Makbet və Ali Oop çıxış edir.