Danston gəlir

Dəbdəbəli «Macestik» hotelinin əməkdaşları təmtəraqlı karnaval gecəsinə ciddi hazırlıq görürlər. Bayramın problemsiz keçməsi idarəçiyə çoxdankı məzuniyyət, tamahkar sahibəyə isə böyük gəlir vədlərini verir. Elə bu ərəfədə mehmanxanaya qəribə bir qonaq və onun Danston adlı oranqutanı təşrif buyurur. Mehmanxana heyəti isə yeni müştərinin əslində oğru olduğundan və meymunu qonaqların ciblərinə girməyə öyrətdiyindən xəbərsizdir.

Danston sahibinin əmrlərindən bezərək ondan qaçdıqda bütün planlar alt-üst olur. Mehmanxana rəhbərinin uşaqları ilə rastlaşan sevimli heyvan tezliklə onlarla möhkəm dostluq qurur. Şən uşaqlar və diribaş oranqutan birləşərək hazırlıqların getdiyi elit məkanı sözün əsl mənasında sirk meydançasına çevirirlər.

«Dunston Checks In» macəra komediyası 1996-cı ildə ABŞ-də ekranlaşdırılıb. Filmin quruluşçu rejissoru Ken Kuopisdir, əsas rolları isə Paula Malkomson, Sem, Denni Komden və Qlenn Şediks canlandırıblar.