Mənim anam su pərisidir

Oksford professoru Tomas Bredli həyat yoldaşının vəfatından sonra on iki yaşlı qızı Sirena ilə tək qalır və işini itirmək təhlükəsi ilə üzləşir. Tədqiqatlarını tamamlamaq və vəzifəsini qorumaq məqsədilə ata və qız Yunanıstana yola düşürlər. Atasının dəstəyə ehtiyacı olduğunu anlayan balaca Sirena yerli qadınlar arasından ona həyat yoldaşı tapmağa çalışsa da, Tomasın utancaqlığı bu işə mane olur.

Bir gün qızcığaz Nereida adlı sirli və ağıllı bir su pərisi ilə qarşılaşır. Sirena dəniz gözəlinin atası üçün ən yaxşı namizəd olduğunu düşünür. Lakin qızın bu arzusuna təhlükə yaranır, çünki kapitan Mavros artıq Nereidanın izinə düşüb və onun heç də xoş niyyətləri yoxdur.

«Mənim anam su pərisidir» adlı ailəvi fantastik filmi rejissor Alki Devid çəkib. Böyük Britaniya və Yunanıstanın birgə istehsalı olan bu lent 2007-ci ildə işıq üzü görüb. Ekran əsərində əsas rolları Oliviya Qrant, Kayl Kaşman, Ember Savva və Feliks Yanets canlandırıblar.