Nensi Drü və gizli pilləkən

Həyat yoldaşının vəfatından sonra Karson qızı ilə birlikdə Çikaqodan River-Hayts qəsəbəsinə köçür. Lakin bu kiçik məkandakı sakit həyat on altı yaşlı Nensiyə darıxdırıcı gəlir və o, daim özünə maraqlı məşğuliyyət axtarır. Tezliklə gənc qız qəribə hadisələrin baş verdiyi qədim bir evdə tək yaşayan yaşlı qadına kömək etməyi qərara alır.

Evdə nə baş verdiyini anlamaq üçün Nensi gecəni qadının malikanəsində keçirir. Çox keçmədən o, qapıların öz-özünə açılıb-bağlandığını, əşyaların havada hərəkət etdiyini görür və plaşlı naməlum bir şəxsdən təhlükə ilə bağlı xəbərdarlıq alır. Beləliklə, «Nancy Drew and the Hidden Staircase» filmi cəsarətli qızın bu sirli hadisələrin izinə düşməsindən bəhs edir.

ABŞ istehsalı olan bu detektiv filmi rejissor Kett Şi 2019-cu ildə çəkib. Əsas rolları Cennifer Rayker, Laura Uiggins, Linda Lavin və Cey Devon Conson canlandırıblar.