Bethoven 4

Şəhər parkında növbəti gəzinti dəcəl senbernar üçün gözlənilməz qarşılaşma ilə nəticələnir. Bethoven özünə iki damla su kimi bənzəyən Mikelancelo adlı başqa bir itlə rastlaşır. Lakin zahirən eyni olsalar da, Mikelancelo yüksək tərbiyəsi və kübar davranışları ilə fərqlənir. İki bənzər it yerlərini dəyişmək qərarına gəlir.

Nyutonlar ailəsi həmişə dəcəllik edən ev heyvanlarının birdən-birə nəzakətli və intizamlı bir centlmenə çevrildiyini görüb heyrətə düşür. Əsl dəcəl Bethoven isə zəngin Secvik ailəsinin malikanəsinə düşür. Qayda-qanuna vərdiş etmiş yeni sahiblər bu nəhəng itin şıltaqlıqları ilə qarşılaşaraq çaşqınlıq içində qalırlar.

2001-ci ildə ABŞ-da istehsal olunmuş «Bethoven 4» komediya filminin rejissoru Devid M. Evansdır. Ekran əsərində əsas rolları Cadc Raynhold, Culiya Suini, Co Pixler və Vinni Koks canlandırıblar. Bu lent məşhur senbernar haqqında franşizanın dördüncü hissəsidir.