Fırıldaq

Yeniyetmələr Ben və Qriffin təsadüfən Honus Vaqnerin təsvir olunduğu nadir beysbol kartını tapırlar. Benin ailəsi evdən çıxarılmaq təhlükəsi ilə üzləşdiyi üçün dostlar bu tapıntını satmaq qərarına gəlirlər. Onlar kolleksiya malları mağazasının sahibi Svindellə müraciət edir və uzun danışıqlardan sonra kartı üç yüz dollara verirlər. Razılaşmadan məmnun qalan gənclər gerçək dəyərdən xəbərsiz şəkildə evə qayıdırlar.

Tezliklə məlum olur ki, həmin kart əslində bir milyon iki yüz min dollar qiymətindədir. Mağaza sahibinin onları aldatdığını anlayan Qriffin haqqını bərpa etmək istəyir. O, fırıldaqçını öz hiyləsi ilə cəzalandırmaq və kartı geri almaq üçün plan qurur. Bu məqsədlə Qriffin dostlarını bir araya toplayaraq xüsusi bir komanda formalaşdırır.

«Fırıldaq» (Swindle) ailəvi macəra filmi rejissor Conatan Cadc tərəfindən lentə alınıb. ABŞ və Kanadanın birgə istehsalı olan ekran işi 2013-cü ildə işıq üzü görüb. Əsas rolları Noa Krouford, Ekstaziya Sanders, Aurelio Dinunsio və Kris Şilds canlandırıblar.