Zürafə Raf

Paterson adlı balaca oğlan və Raf adlı zürafə eyni gündə dünyaya göz açıblar. Qonşuluqda yaşayan bu iki yoldaş bütün vaxtlarını birgə keçirir və bir-birindən heç vaxt ayrılmırlar. Nəhayət, məktəbə getmək vaxtı çatır və hər ikisi bu yenilikdən xeyli həyəcanlanır. Paterson dərsin ilk günü çantasını nəhəng dostu üçün müxtəlif təamlarla doldurur, lakin Rafın onunla məktəbə gedə bilməyəcəyini öyrəndikdə çox kədərlənir.

Zaman keçdikcə oğlan dərslərə öyrəşir və sinifdə özünə yeni bir dost tapır. Zooparkda tək qalan Raf isə özünü unudulmuş hiss edir və yoldaşı üçün darıxır. Bunu anlayan Paterson sevimli zürafəsini məktəbə gətirmək və hər iki dostu ilə birlikdə vaxt keçirmək üçün maraqlı bir plan qurur.

«Zürafə Raf» ailəvi filmi 2017-ci ildə Almaniya, Niderland və Belçikanın birgə istehsalı ilə çəkilib. Ekran əsərinin quruluşçu rejissoru Barbara Brederodur. Filmin əsas rollarını Medi Brukman, Ferdi Stofmel, Dolores Levin və Hub Smit canlandırıblar.