Gəmi quran

Yaşlı bir dənizçi özünə qayıq düzəltməyə başlayır və bu zaman kimsəsiz bir uşaq onun yanına pənah gətirir. Ömrü boyu müəyyən nizam-intizama öyrəşmiş qocanın qaydaları balaca yetim üçün tamamilə yaddır. Yaş fərqi və fərqli vərdişlər səbəbindən onların ilk vaxtlar yola getməsi asan olmur.

Birgə görülən iş «The Boat Builder» filminin qəhrəmanlarını tədricən bir-birinə bağlayır. İxtilafları və anlaşılmazlıqları arxada qoyan bu iki insan zaman keçdikcə ortaq dil tapır. Nəticədə hər ikisi başa düşür ki, bu həyatda bir-birlərindən başqa arxalanacaq heç kimləri qalmayıb.

ABŞ istehsalı olan bu ailəvi dram 2017-ci ildə rejissor Arnold Qrossman tərəfindən lentə alınıb. Filmin əsas rollarında Aaron Vilton, Rayan Vayli, Janett Pavini və Hezer Matison çəkiliblər.