SpaceBoy

On bir yaşlı Cim elmlə və kosmosun sirləri ilə dərindən maraqlanır. Atası ilə birlikdə yeni şəhərə köçdükdən sonra o, yerli məktəbdə təşkil olunan elm yarışmasına qatılmaq qərarına gəlir. Bu işdə onun komanda yoldaşı sinif yoldaşı Emma olur.

Cim 1960-cı ildə Cozef Kittincerin stratosferə qalxdığı məşhur «Ekselsior» layihəsini təkrarlamaq və nəhəng hava şarı qurmaq fikrinə düşür. Vaxtilə astrofizik olan atası Qrem də bu layihə üzərində çalışmış, lakin sonradan yarımçıq qoymuşdu. Atasından fərqli olaraq təslim olmayacağını göstərmək istəyən oğlan Emmanı da bu çətin sınağa cəlb edir və bu birgə fəaliyyət onları yaxınlaşdırır.

2021-ci ildə Belçikada çəkilmiş «SpaceBoy» macəra filminin rejissoru Olivye Perudur. Filmdə əsas obrazları Mişel Şiyasi, Peter van den Beqin, Arno Şarren və Müriel Bersi canlandırıb.