Mənim cangüdənim

Atası və nənəsi ilə birlikdə Çikaqoya köçən Klifford Piç tamamilə fərqli bir mühitlə qarşılaşır. Yeni şəhərin binaları, sakinləri və ab-havası oğlana yad gəlir. Üstəlik, təhsil aldığı yeni məktəbdə də vəziyyət ürəkaçan olmur və o, çətin günlər keçirməyə başlayır.

Yuxarı sinif şagirdləri Kliffordu incidərək onun pullarını əlindən alırlar. Daimi təzyiqlərdən yorulan yeniyetmə bu vəziyyətdən çıxış yolu axtarır. O, bütün məktəbin qorxduğu Linderman adlı iri cüssəli oğlanı özünə cangüdən tutmaq qərarına gəlir.

«My Bodyguard» filmi 1980-ci ildə ABŞ-da lentə alınıb və ailəvi dramla komediya janrlarını birləşdirir. Ekran işinin rejissoru Toni Billdir, əsas rolları isə Ancelo Entoni Buskalya kiçik, Marc Kotliski, Tim Kazurinski və Kreyq Riçard Nelson canlandırıblar.