Parisə pasport

Melani və Ellison Fransada yaşayan qohumlarına baş çəkmək üçün səfərə hazırlaşırlar. Çantalarını toplayan bacılar bu səyahətin əyləncəli keçəcəyini səbirsizliklə gözləyirlər. Fransanın paytaxtına gələn kimi qızların arzuları gerçəkləşir və onlar burada iki yerli oğlana aşiq olurlar.

Şəhər gəzintiləri gənclər üçün maraqlı anlarla zənginləşir. Şən heyət mopedlərlə Paris küçələrini dolaşır, mağazaları gəzir və məşhur yerləri kəşf edir. «Passport to Paris» komediyasının qəhrəmanları dəbli butiklərdə alış-veriş edir, Notr-Dam kilsəsini ziyarət edir və Eyfel qülləsində şam yeməyi yeyirlər.

ABŞ istehsalı olan bu ailə filmi 1999-cu ildə rejissor Alan Metter tərəfindən çəkilib. Baş rolları əkiz bacılar Meri-Keyt Olsen və Eşli Olsen canlandırıb, digər rollarda isə Piter Vayt və Mett Uinston çıxış edib.