Super Nani

Bharti Bhatia bütün gününü doğmalarının qayğısına və şıltaqlıqlarına sərf edir. Hökmlü əri, birjada oynayan oğlu, serial ulduzu olmağa çalışan gəlini və müasir baxışlı qızı onun bu zəhmətini əsla qiymətləndirmir. Fədakar qadın hər kəsin nazı ilə oynasa da, evdəkilərdən yalnız soyuqluq, istehza və hörmətsizlik görür.

Hər şey nəvəsi Mannın Hindistana qəfil gəlişi ilə dəyişir. Evdə güclü bir xanım görməyi gözləyən gənc, ailə üzvlərinin nənəsini alçaltdığını və ona qulluqçu kimi yanaşdığını sezir. Yaranmış vəziyyətlə barışmaq istəməyən Mann nənəsinin kədərli həyatını canlandırmaq və evdəki münasibətləri büsbütün silkələmək qərarına gəlir.

2014-cü ildə çəkilmiş «Super Nani» Hindistan istehsalı olan ailəvi komediya-dram filmidir. Ekran əsərinin rejissoru İndra Kumar, baş rol ifaçıları isə Rekha, Şarman Coşi, Randhir Kapur və Anupam Kherdir.