Harri Potter və Mələz Şahzadə

Volan-de-Mortun artan təsiri artıq təkcə cadugərlər aləminə deyil, maqlların da həyatına sirayət edir. Bir vaxtlar ən etibarlı məkan sayılan Hoqvarts qəsri getdikcə müdafiəsiz qalır və Harri təhlükənin elə məktəbin daxilində gizləndiyindən şübhələnir.

Direktor Dambldor isə şagirdini yaxınlaşan son döyüşə hazırlamaqla məşğuldur. Qaranlıq Lordun ölümsüzlük sirrini öyrənmək məqsədilə o, köhnə dostu və həmkarı professor Horasi Sliznortu iksirlər üzrə müəllim kimi yenidən məktəbə dəvət edir.

Məşhur sehrbazlıq franşizasının bu altıncı filmini rejissor Devid Yeyts ərsəyə gətirib. ABŞ və Böyük Britaniyanın ortaq istehsalı olan «Harry Potter and the Half-Blood Prince» 2009-cu ildə nümayiş olunub, əsas obrazları isə Deniel Redkliff, Rupert Qrint, Emma Uotson və Maykl Qembon canlandırıb.