İmperatorun yürüşü

Qış fəslinin gəlişi ilə qütb sularının sakinləri çətin bir səfərə hazırlaşırlar. «İmperatorun yürüşü» sənədli filmi min illərdir eyni marşrutu təkrarlayan imperator pinqvinlərinin həyat dövranını nümayiş etdirir. Quşlar təhlükəsiz okean sularını tərk edərək Antarktidanın donmuş sahillərinə çıxırlar.

Böyük pinqvin dəstələri başqa canlıların yaşamadığı sərt buz qitəsinin içərilərinə doğru irəliləyirlər. Qar çovğununa və dondurucu şaxtaya baxmayaraq, onlar nəsil artırmaq üçün nəzərdə tutulmuş yerlərə doğru addımlayırlar. Yalnız bu məsafəni qət etməklə quşlar öz nəsillərini davam etdirə bilirlər.

Fransa istehsalı olan bu filmin rejissoru Lük Jakendir və ekran əsəri 2004-cü ildə nümayiş olunub. Orijinal versiyada mətni Roman Borinje, Şarl Berlen və Jül Sitruk, ingilisdilli variantda isə Morqan Friman səsləndirib.