Ağ Diş

Bir ovçunun gülləsinə tuş gələn anasını itirən balaca canavar təbiətdə təkbaşına qalır. Təxminən həmin vaxtlarda Cek adlı gənc Klondayka yollanır. Qızıl hərisliyinin tüğyan etdiyi bir dövrdə o, vəfat etmiş atasından miras qalan torpaq sahəsini axtarmağa çalışır.

Şimalın sərt təbiəti bu gənc ilə canavarı qarşı-qarşıya gətirir. Cek və Ağ Dişin yolları dəfələrlə ayrılsa da, həyat onları yenidən bir araya çıxarır. Zaman keçdikcə insanla vəhşi heyvan arasında çətinlikləri dəf etməyə kömək edən güclü bir bağ yaranır.

ABŞ istehsalı olan macəra filmi «White Fang» 1991-ci ildə rejissor Rendal Klayzer tərəfindən çəkilib. Ekran əsərində əsas rolları İtan Houk, Klaus Maria Brandauer, Seymur Kessel və Ced adlı heyvan canlandırıb.