Dayə

Ali təhsilli Cenni Morqan karyera imkanlarına uyğun gəlməyən qeyri-adi bir iş təklifini qəbul edir. O, iki uşağını tək böyüdən varlı Oliver Koldvellin malikanəsinə dayə kimi yollanır. Lakin evə gəldiyi andan etibarən qız heç də asan tərbiyə olunmayan, böyüklərin sözünə baxmayan ərköyün uşaqlarla qarşılaşır.

Evin daxilindəki vəziyyətlə tanış olduqca Cenni ailənin digər sirlərini də öyrənir. Ev sahibi tezliklə uşaqlara nifrət edən, soyuq və təkəbbürlü Vivian ilə evlənməyə hazırlaşır. Gələcək ögey ananın kobud rəftarı həm uşaqları, həm də dayəni eyni cəbhədə birləşdirir. Qardaş və bacı bu arzuolunmaz qadından yaxa qurtarmaq və atalarını Cenni ilə evləndirmək üçün gizli plan qururlar.

1999-cu ildə çəkilmiş «Dayə» filmi ABŞ və Macarıstan istehsalıdır. Romantik ailə komediyasının quruluşçu rejissoru Mark Qriffitsdir. Baş rolları Qreqori Harrison, Heydi Lenhart, Ceyn Sibbett və Keti Voldinq canlandırıblar.