Mannu Çanaqqalada

Dəcəl koala Mannu sahibi Vilyamın çantasına gizlicə girərək uzaq səfərə qoşulur. Gənc oğlan babasının xatirəsini yad etmək məqsədilə Avstraliyadan Türkiyəyə, Gelibolu yarımadasındakı ANZAK anım mərasiminə yollanır və özü ilə ailə yadigarını aparır. Lakin Əlahəzrət ləqəbli sirli şəxsin tapşırığını yerinə yetirən qarətçilər Harri və Gerri də həmin medalyonu ələ keçirmək üçün onların ardınca gəmiyə minirlər.

İzmir sahillərində başlayan qarşıdurma nəticəsində balaca koala oğrularla birgə dənizə düşür və sahilə sahibindən daha tez çatır. İndi Mannu Vilyamı tapmaq, Çanaqqalaya qədər olan yolu qət etmək və dəyərli medalyonun bədniyyətli insanların əlinə keçməsinin qarşısını almaq məcburiyyətindədir.

Türkiyə istehsalı olan «Mannu Çanaqqalada» cizgi filmi 2023-cü ildə təqdim edilib. Ekran işinə Şenol Qılıc və Lətif Təkin rejissorluq edib, əsas qəhrəmanları isə Bərrak Quş, Şeyma Ayıq, Onur Qırış və Lütfi Birses səsləndirib.