Skafandr və kəpənək

Elle France jurnalının redaktoru Jan-Dominik Bobi 43 yaşında gözlənilməz insult keçirir. Bu xəstəlik nəticəsində o, bütün bədəni iflic vəziyyətinə düşərək danışmaq və hərəkət etmək qabiliyyətini itirir. Xarici dünya ilə əlaqə qurmaq üçün onun sərəncamında yalnız hərəkət edə bilən sol göz qapağı qalır.

«Skafandr və kəpənək» filmi bu dözülməz şəraitdə ünsiyyət tapmağın yolunu təqdim edir. Yanındakı insanın sadaladığı hərflərə göz qırpmaqla reaksiya verən Jan-Dominik öz daxili iztirablarını, bədənində həbs olunmağın ağırlığını və təxəyyülündə yaratdığı geniş aləmləri addım-addım ifadə etməyə müvəffəq olur.

2007-ci ildə Fransa və ABŞ kinematoqrafçıları tərəfindən lentə alınmış bu bioqrafik dramın rejissoru Culian Şnabeldir. Ekran əsərində baş qəhrəmanı Matye Amalrik canlandırıb, digər rollarda isə Emmanüel Senye, Mari-Joze Kroz və Ann Kosinyi çıxış ediblər.