The Normal Heart

1981-ci ilin yayı, Nyu-York. Yazıçı Ned Uiks dostunun ad gününü qeyd etmək üçün çimərlikdəki evə yollanır, lakin qəfil xəstəlik və ardınca baş verən ölüm məclisi yasa çevirir. Narahat olan Ned həkim Emma Bruknerin qəbuluna gedir. Həkim Nedin sağlam olduğunu təsdiqləsə də, şəhərdə yalnız homoseksual kişilər arasında yayılan təhlükəli və naməlum bir infeksiyanın başladığını bildirir.

Əlində az sayda fakt olan doktor Brukner xəstəliyin səbəblərini anlamağa çalışır və araşdırmalara başlayır. Ned isə yaxınlarını bu təhlükədən qorumaq məqsədilə xəbərdarlıq etmək üçün dostlarının yanına qayıdır. Ətrafındakı insanlar bir-bir həyatını itirdikcə, yazıçı susmamaq qərarına gəlir. O, QİÇS böhranını cəmiyyətə çatdıran və problemin səhiyyə gündəminə gəlməsi üçün səylərini əsirgəməyən ilk fəallardan birinə çevrilir.

Bioqrafik drama filmi olan The Normal Heart 2014-cü ildə rejissor Rayan Mörfi tərəfindən lentə alınıb. ABŞ istehsalı ekran əsərinin baş rollarında Mark Ruffalo, Mett Bomer, Teylor Kitç və Cim Parsons çıxış edir.