Southern Gospel

Pastr ailəsində böyüyən Samuel Allen uşaqlıqda atasının yolunu davam etdirmək istəsə də, yaşadığı faciə və incikliklər onu dindən uzaqlaşdırır. 1960-cı illərdə o, rok ifaçısı kimi böyük şöhrət qazanır. Bununla belə, uğur onun həyatına nizamsızlıq və narkotik asılılığı gətirir.

Ağır avtomobil qəzasından sonra sənətçi dəmir barmaqlıqlar arxasına düşür və onu uzunmüddətli həbs cəzası gözləyir. Lakin hakim qeyri-adi qərar verərək, gənclərə zərərli maddələrin fəsadlarından danışmaq şərti ilə ittihamları ləğv edir. Əldə etdiyi ikinci şans sayəsində Samuel keçmiş səhvlərini düzəltmək, inancına qayıtmaq və nəhayət vaiz olmaq qərarına gəlir.

ABŞ istehsalı olan «Southern Gospel» bioqrafik musiqili dram filmi 2023-cü ildə təqdim edilib. Ekran əsərində əsas obrazları Emma Mayers, Qari Uiks, Keytlin Neykon və Bördcess Cenkins canlandırıb.