Buzlaqların arxasınca

«National Geographic» jurnalının fotoqrafı Ceyms Baloq uzun müddət qlobal istiləşmə məsələsinə şübhə ilə yanaşırdı. Lakin Arktikaya etdiyi işgüzar səfər zamanı qütb buzlarının əriməsinin fəsadlarını öz gözləri ilə görməsi onun fikirlərini tamamilə dəyişdi. Bu proses dünya okeanının səviyyəsinin qalxmasına, bütöv ölkələrin su altında qalma təhlükəsinə və hava şəraitinin kəskin dəyişməsinə səbəb olur.

Bundan sonra Baloq Qrenlandiya və Arktika buzlaqlarını tədqiq etmək üçün xüsusi ekspedisiya təşkil etdi. O, buzlaqlardakı dəyişiklikləri bir neçə il ərzində fasiləsiz qeydə almağa imkan verən xüsusi avadanlıqlar və kameralar hazırladı. Müxtəlif çətinliklərə baxmayaraq, tədqiqatçı minillik buz kütlələrinin necə yox olduğunu nümayiş etdirən təkzibolunmaz vizual sübutlar toplamağı bacardı.

«Chasing Ice» bioqrafik sənədli filmi 2012-ci ildə ABŞ-da rejissor Ceff Orlovski tərəfindən çəkilib. Ekran əsərində Ceyms Baloq, Svavar Conatansson, Lui Sahoyos və Kitti Bun yer alıblar.