Sabahın xeyir, Vyetnam

1965-ci ildə Vyetnamda xidmət edən amerikalı hərbçilərin günləri sakit keçir. Lakin ordu radiosuna yeni aparıcı Adrian Kronauerin təyin olunması bu monotonluğu tamamilə pozur. Efirə çıxan kimi səsləndirdiyi cəsarətli zarafatlar əsgərlər arasında böyük coşğu yaradır.

Özünəməxsus tərzi sayəsində radioaparıcı tez bir zamanda dinləyicilərin sevimlisinə çevrilir. Lakin onun hərəkətləri və intizama meydan oxuyan çıxışları yüksək rütbəli rəisləri narahat etməyə başlayır. Zabitlərin narazılığına baxmayaraq, onun məşhur səhər salamı hərbi qərargahlarda əks-səda verməkdə davam edir.

«Good Morning, Vietnam» filmi 1987-ci ildə amerikalı rejissor Barri Levinson tərəfindən çəkilib. Hərbi komediya və bioqrafik dram janrında olan bu layihədə baş rolları Robin Uilyams, Forest Uitaker, Bruno Körbi və C.T. Uolş canlandırıblar.