Yaşıl kitab

Ötən əsrin altmışıncı illərində Nyu-York gecə klubunun təmirə bağlanması səbəbindən Toni ləqəbli mühafizəçi müvəqqəti iş axtarmağa məcbur qalır. Həmin vaxt yüksək təbəqəyə mənsub zəngin və istedadlı qaradərili pianoçu Don Şirli cənub ştatlarına qastrol səfərinə hazırlaşır. İrqi ayrı-seçkiliyin hökm sürdüyü bu bölgələrdə klassik musiqiçiyə həm sürücü, həm cangüdən, həm də problemləri həll edə biləcək etibarlı köməkçi lazımdır.

Bir-birindən tamamilə fərqli olan bu iki adam uzun yola birlikdə çıxırlar. Cənubun qatı qaydaları və qarşılaşdıqları təhlükələr onların münasibətlərini ciddi sınağa çəkir. Müxtəlif mühitlərdən çıxmış yol yoldaşlarının bu birgə səfəri hər ikisinin həyata baxışını və daxili dünyasını kökündən dəyişdirir.

«Green Book» filminin rejissoru Piter Farrellidir. ABŞ və Çin istehsalı olan bu bioqrafik dram və komediya filmi 2018-ci ildə ekranlara çıxıb. Əsas rolları Viqqo Mortensen, Maherşala Əli, Linda Kardellini və Sebastyan Maniskalko canlandırıblar.