VIII Henri

Gənc yaşlarında cazibədar bir şahzadə olan VIII Henri sonradan İngiltərəni qorxu içində saxlayan amansız hökmdara çevrildi. Otuz səkkiz illik hakimiyyəti dövründə o, ölkənin bütün ictimai və dini qaydalarını kökündən dəyişdi. Saray daxilindəki rəqabət və kralın şəxsi həyatı isə hər an ölüm gətirə bilən amansız bir mübarizə meydanına çevrildi.

Kral taxt üçün oğul varisi qazanmaq naminə heç bir sərhəd tanımadı. İstədiyi boşanmaya icazə verməyən Roma Papasına cavab olaraq katolik kilsəsi ilə əlaqələri qırdı və monastırların əmlakını müsadirə etdi. Həyatı boyunca altı dəfə evlənən monarx iki xanımının başını kəsdirdi, qızlarını diqqətdən kənarda saxladı və siyasi rəqibləri ilə yanaşı köhnə dostlarını da cəzalandırdı.

Böyük Britaniya istehsalı olan «VIII Henri» bioqrafik filminin rejissoru Pit Trevisdir. 2003-cü ildə təqdim olunan tarixi dramda əsas rolları Rey Uinston, Coss Eklend, Devid Suşe və Mark Stronq ifa ediblər.