Soorarai Pottru

Hindistan Hərbi Hava Qüvvələrinin sabiq pilotu Nedumaaran Racanqam sadə vətəndaşların istifadə edə biləcəyi ucuz aviaşirkət yaratmağı hədəfləyir. Onu bu yola sövq edən hadisə isə ağır şəxsi itki ilə bağlıdır. Atasının ölüm ayağında olduğunu öyrənən gənc evə uçmaq üçün bilet almağa çalışır, lakin yetərli vəsaiti olmur.

Hava limanındakı insanlardan kömək istəsə də, heç kim ona pul vermir. Nəticədə o, qatar və maşınla yol getməyə məcbur qalır. Nedumaaran kəndə çatanda atasının artıq vəfat etdiyini və dəfn mərasiminin bitdiyini görür. Bu acı təcrübə onu adi insanların da təyyarə ilə rahat səyahət edə bilməsi üçün mübarizəyə sövq edir.

2020-ci ildə Hindistanda istehsal olunmuş «Soorarai Pottru» filminin rejissoru Sudha Konqaradır. Bioqrafik dram növündə çəkilən ekran əsərində baş rolları Suriya Sivakumar, Pareş Raval, Aparna Balamurali və Qaurav Parik canlandırıblar.