Dünyanı xilas edən adam

Təqaüddə olan sovet zabiti Stanislav Petrovun adı çoxlarına tanış deyil, lakin onun verdiyi qərar yüz milyonlarla insanın həyatını qoruyub. 1983-cü ilin payızında raket hücumu barədə xəbərdarlıq siqnalı alan növbətçi zabit yaranmış vəziyyəti ayıq başla qiymətləndirdi. Onun texniki nasazlıq ehtimalına güvənməsi nüvə müharibəsinin başlanmasının qarşısını aldı.

«Dünyanı xilas edən adam» sənədli-bədii filmi həmin gərgin anları və bu addımı atmış insanın sonrakı taleyini əks etdirir. Əsərdə böhran anının bədii canlandırması ilə yanaşı, arxiv kadrları və hadisənin canlı şahidi ilə söhbətlər bir araya gətirilib. Hər saniyənin önəm daşıdığı o gecə bəşəriyyətin gələcəyini kökündən müəyyənləşdirdi.

Ekran əsərinin quruluşçu rejissoru Piter Entonidir. 2015-ci ildə ABŞ, Danimarka, Rusiya və Latviya kinematoqrafçıları tərəfindən lentə alınan bu bioqrafik dramda Stanislav Petrov ilə yanaşı Kevin Kostner, Sergey Şnıryov və Nataliya Vdovina çəkiliblər.