Heyvanxana nəzarətçisinin həyat yoldaşı

1939-cu ilin payızında nasist qoşunlarının Polşaya hücumu Varşavadakı dinc nizamı alt-üst edir. Jan Jabinski və xanımı Antonina uzun müddət yerli zooparkı idarə edir, lakin müharibə hər şeyi məhvə aparır: heyvanlar tələf olur, heyvanxana bağlanır, yerli yəhudilər isə gettolara sürgün edilir.

Ailənin yaxın dostu təhlükə ilə üzləşəndə Antonina onu zooparkın ərazisində gizlətmək təklifini irəli sürür. Bu cəsarətli və təhlükəli addım ər-arvad üçün genişmiqyaslı gizli fəaliyyətin başlanğıcına çevrilir. Onlar öz həyatlarını təhlükəyə ataraq, boş qalmış qəfəslərdə təqib olunan insanları qorumağa çalışırlar.

«The Zookeeper's Wife» bioqrafik hərbi dramını rejissor Niki Karo çəkib. ABŞ, Böyük Britaniya və Çexiyanın birgə istehsalı olan 2017-ci il ekran əsərində baş rolları Cessika Çesteyn, Yohan Heldenberq və Daniel Brül canlandırıb.