Karavacco

Uşaqlıq illərində Mikele Merizi gənc Konstansiya Kolonna ilə möhkəm dostluq bağları qurur. Hər cür çətinlikdə bir-birlərinə dayaq olacaqlarına söz verən uşaqların yolları erkən ayrılmalı olur. Anası gələcəyin sənətkarını Milana, Simone Petersanonun emalatxanasına şagird göndərir. Burada keçən ağır təhsil illəri oğlanın böyük istedadını üzə çıxarmaqla yanaşı, onun idarəolunmaz və çılğın xasiyyətini də formalaşdırır.

Anasının vəfatından sonra kiçik bir miras əldə edən gənc rəssam Romanı fəth etməyə yollanır. Dostu Konstansiyanın təhlükələr barədə xəbərdarlığı tezliklə gerçəkləşir: yerli sənətkarlar onu yanına götürməkdən imtina edir. Yeni dostları ilə səfil və davakar həyat sürən Mikele nəhayət bir sığınacağa düşür. Qeyri-adi istedada malik rəssamı kəşf edən və ona ömrünün sonunadək hamilik edən kardinal Françesko Del Monte onun taleyini burada dəyişir.

2007-ci ildə ekranlara çıxan «Karavacco» tarixi və bioqrafik filmdir. İtaliya, Fransa, Almaniya və İspaniyanın birgə istehsalı olan bu layihənin rejissoru Andjelo Lonqonidir. Əsas obrazları Alessio Boni, Elena Sofiya Ritççi, Jordi Molya və Paolo Briqulya canlandırıb.