Ən yaxşı

«Najlepszy» bioqrafik filmi polşalı idmançı Yeji Qurskinin çətin taleyindən bəhs edir. Beynəlxalq arenada böyük uğura imza atsa da, o, uzun illər öz vətənində az tanınan bir şəxs olaraq qalıb. Zirvəyə gedən yol isə dərin böhranlar, həyatın dibinə yuvarlanma və öz taleyini kökündən dəyişmək cəhdləri ilə başlayıb.

Şəxsi həyatındakı hadisələr və nümayiş etdirdiyi iradə qəhrəmanı böyük idmana gətirib çıxarır. Bütün sınaqlara baxmayaraq güc toplayan idmançı, triatlon üzrə dünya çempionatının son dərəcə ağır məsafəsini qət edərək yeni dünya rekorduna sahib olur.

Polşa istehsalı olan bu idman dramı 2017-ci ildə rejissor Lukaş Palkovski tərəfindən lentə alınıb. Baş qəhrəman obrazını Yakub Qerşal canlandırıb, digər mühüm rolları isə Arkadiuş Yakubik, Yanuş Qayos və Artur Jmiyevski ifa ediblər.